Rindërtimi i vendit të rrënuar nga pasojat e luftës kundër okupacionit nazi – fashist, ritmet e larta, veçanërisht në tri dekadat e para të zhvillimit të degëve të ndryshme të ekonomisë kombëtare të centralizuar, të arsim kulturës, të shkencës dhe të zhvillimit e të modernizimit të forcave të armatosura në sajë të ndihmës të gjithanëshme të ish vendeve socialiste , krijuan premisat për ngritjen e institucioneve, të ndërmarrjeve e sektoreve topogjeodezike dhe hartografike pranë dikastereve të ndryshme.

Këto institucione e ndërmarrje kishin për detyrë t’u paraprinin studimeve të veprave të ndryshme me sigurimin e bazës topografike në shkallët e duhura, të garantonin zbatimin e tyre në terrenin e dhënë dhe të kryenin ripërtëritjen periodike të hartave për të siguruar aktualitetin e informacionit gjeografik për regjionet me zhvillim më intensiv të forcave prodhuese

Për ngritjen e institucioneve e të sektorëve topogjeodezikë e hartografikë dilte si emergjente problemi i përgatitjes masive të kuadrove të mesëm e të lartë të profilit kryesisht topogjeodet. Në periudhën 1945 – 1947 në vendin tonë ishin gjithsej 10 inxhinierë nga të cilët 6 ushtarakë të përgatitur në shkollat perendimore, si dhe një grup i vogël gjeometrash – topografë të përgatitur pranë shkollës teknike të Fultzit. Gjithashtu trashëguam dhe disa teknikë-topografë të përgatitur nga ministria e bujqësisë në kohën e mbretit Zogu I për nevojat e zbatimit të reformës agrare.

Për këtë arsye iu dha përparësi përgatitjes së kuadrit e në rradhë të parë të teknikëve të mesëm topografë nëpërmjet kurseve specialë 9 mujorë, fillimisht pranë ish Ministrisë së Bujqësisë dhe Ministrisë së Industri Minierave. Në këto kurse u përgatitën rreth 750 teknikë. Me vonë kerkesat për përgatitjen e kuadrove të mesme të profilit topograf u plotësuan nga përgatitja e tyre pranë Shkollës së Bashkuar dhe Shkollës së Mesme të Ndërtimit “Karl Gega“. Për përgatitjen e kuadrove topogjeodetë me arsim të lartë në përiudhën 1948 – 1960 u morën masat të përgatiteshin në shkollat e ish vendeve të kampit socialist rreth 21 specialistë në fushën e gjeodezisë, fotogrametrisë e hartografisë pasqyra e mëposhtëme.